A segunda edición da Media Maratón Ribeira21 arrincará o vindeiro domingo 3 de xuño desde o peirao de Aguiño. A cita, que tamén acollerá os Campionatos de Galicia absoluto, júnior, promesa e veterano, foi presentada esta mañá na casa consistorial da capital barbancesa. O edil de Deportes, Anxo Orellán, o secretario da Federación Galega de Atletismo, Carlos Castro, e Juan Manuel Olveira, en representación do club Atletismo Santa Uxía, debullaron algunhas das características da competición. A distancia será de 21.097 metros, e a comitiva partirá de Aguiño ás 10.00 horas con dirección Ribeira. Unha vez en Santa Uxía deberán completar un circuíto urbano que nace no dique e termina en Coroso. O percorrido está homologado pola Real Federación Española de Atletismo.