A Carreira Pedestre de Noia cumprirá 20 edicións o próximo tres de setembro. Farao con enerxías renovadas, cun circuíto novo, perfeccionado para que os corredores de todo tipo poidan abordar a proba con todas as garantías. O evento, que se presentou onte no concello noiés, contará coa colaboración de La Voz de Galicia e coa organización do Club Atletismo Noia.
O edil de Deportes, Ramón Santos, foi o encargado de dar as primeiras pinceladas sobre a cita e enxalzou a tradición dunha competición que xa é un referente na zona e nas comarcas veciñas. «Seguirmos apostando por esta carreira. Temos o propósito de consolidala, mellorándoa cada ano», afirmou Santos, á vez que agradecía a La Voz e ao Club Atletismo Noia a súa colaboración.
O edil tamén debullou os diferentes itinerarios que terán que completar os participantes. A carreira chupete será de 250 metros, pitufos 300, benxamín e alevín un quilómetro, infantil, cadete e xuvenil tres, e para rematar, en júnior, promesa, sénior e veterano chegarase ata os 9.000 metros.
O percorrido
Manuel Fariña, do club local, foi o encargado de explicar a ruta e os horarios que terán que seguir os participantes na proba absoluta. A competición chupete empezará ás 21.00 horas, mentres que a sénior será ás 22.00. Todas as categorías partirán da Alameda, chegarán ao paseo marítimo e pasarán polo aparcadoiro Xuíz Falcone. A acceder ao momento de partida terán que facer unha nova volta antes de terminar a competición.
O delegado de La Voz de Barbanza, Ramón Ares, tamén participou no acto de presentación, onde incidiu na necesidade de que os medios de comunicación implíquense neste tipo de actividades para «devolverlle ao público a confianza que el nos dá». Comprometeuse a .. «proporcionar a máxima divulgación posible á carreira a través de todas as plataformas: xornal, páxina web e RadioVoz»
Para rematar, o exciclista Ezequiel Mosquera, incidiu na beleza dunha proba na que exerce como padriño. Os interesados en participar teñen ata o día 31 para inscribirse. Poderano facer na páxina web, onde está habilitado un portal específico.