A San Silvestre Ourensá, nada hai case un ano, regresa ao calendario e faio con algunha novidade. A principal, a localización, xa que a proba atlética achégase ao centro da cidade de Ourense. O Xardín do Posío será o punto de encontro xa que alí estará situada tanto a saída como a chegada da proba.
A cita é o 31 de decembro e este martes viviu a presentación oficial dunha segunda edición que pretende bater os rexistros do ano da súa estrea. A xornada do último día do ano poñerase en marcha ás 16:00 horas, coa carreira dos pitufos, cun percorrido aproximado de 70 metros. Dez minutos máis tarde será a quenda dos sub 10 e sub 12, xa no circuíto programado, e deberán facer fronte a 1,5 quilómetros de percorrido. Ás 16:25 arrincará a carreira sub 14 e sub 16, con 2,5 quilómetros por diante, mentres que a carreira absoluta, con cinco quilómetros de percorrido, empeza ás 16:45.A inscrición, cuxo prazo está aberto ata as 20:30 horas do día 27, pode formalizarse na web
www.carreirasgalegas.com, sendo gratuíta ata sub 16 e cun custo de 5 euros para as demais.
O evento ten carácter solidario e así, de forma voluntaria, os participantes poderán realizar unha doazón 'Dorsal 0' e a recadación será destinada a Cruz Vermella Ourense.