A primeira cita do ano co Correndo por Ourense reuniu no barrio de Ou Vinteún a máis de 600 deportistas. Desta maneira, a oitava edición do circuíto de carreiras populares que organiza o Consello Municipal de Deportes regresou ao grande.
A carreira absoluta dominouna José Manuel Fernández Márquez, que investiu un tempo de 19 minutos 38 segundos, catro segundos menos que José Manuel Curral, segundo, e unha marca 35 segundos mellor que a de Alejandro Montero, que completou o podio. En mulleres, a máis rápida foi Begoña Domínguez (25:28), que avantaxou en 25 segundos á promesa Inés Valentín, segunda con 25:53, mentres que Silvia Teijeiro ocupou a terceira praza con 26:40.
Esta carreira sénior, veterano, promesa e júnior foi finalizada por 463 atletas.
Con anterioridade á carreira dos absolutos desenvolvéronse as probas dos atletas máis novos. A carreira infantil e cadete viviu o dominio dos máis novos xa que tres atletas infantís ocupron as primeiras prazas da xeral. Héctor Rodríguez foi o máis rápido (8:21), seguido de Xián Luís Domínguez (8:31), mentres que o terceiro posto ocupouno Mar Díaz Barreiro (8:43), que ademais foi a mellor entre todas as mulleres. O mellor dos cadetes foi Brais Mosquera,que cun tempo de nove minutos xustos ocupou a cuarta praza da xeral. Entre as mozas cadetes a máis destacada foi Clara Mijangos (9:36).
A carreira alevín e benjamín viviu o claro triunfo de Miguel Castro (5:20), que avantaxou en 20 segundos a Iria Soleira, segunda da xeral e a mellor muller da menor das categorías con crono. Fernando Rivas, con 5:45, ocupou o terceiro posto. Entre os benjamines, os mellores foron Iago Cruz (5:57) e Carmen Cabot (6:16).
O Correndo por Ourense fai agora unha pequena paréntese e en pouco máis dun mes, o 26 de maio, vivirá a segunda das seis citas desta oitava edición, coa Carreira do barrio do Couto.