O bo tempo acompañou durante a mañá a segunda edición do Trail Compostela, no que tomaron parte máis de douscentos atletas. No cadro masculino impúxose Amador Pena, cun tempo de 1.34.59, e no feminino Alba Baamonde, que asinou un crono de 1.50.28. Ambos dominaron a carreira con autoridade. Pena avantaxou en máis de cinco minutos a José Manuel Iglesias e Guillermo Palacios, que completaron o podio. Baamonde sacoulle 21 minutos a Lydia Rodríguez e case 26 a Bea Amado.
En veteranos os gañadores foron Antonio Agulló e Isabel Sáez. E en escolares A Shewaferaw Tomé e Patricia Viadel; en escolares B, Manuel Juanatey e Ángela Noya; e en escolares C, Brais Picón e Carmen Juanatey.