Mañá, coincidindo coa celebración da Noiteboa, terá lugar a edición número 56 do Gran Premio Pedestre do Nadal de Vigo, proba de atletismo coñecida como Carreira do Pavo que se celebrou por primeira vez no ano 1943. Máis de 500 atletas formalizaron as súas inscricións, 413 en categoría absoluta e o resto repartidos entre as sub-16, sub-14, sub-12 e sub-10.
Entre os deportistas que confirmaron a súa presenza atópanse o vencedor en categoría masculina do ano pasado Gonzalo Basconcelo, así como Akka Essaadaoui, Uxía Pérez Bugarín e Alice Finot. Non aparece finalmente entre os inscritos a viguesa Ester Navarrete, a pesar de que anunciou a súa participación, e tampouco a vencedora do 2016, Joselyn Brea.
A proba absoluta constará dun percorrido de cinco quilómetros e comezará ás 11.15 horas. Antes, entre as 10.30 e as 11.00 horas, será a quenda das outras catro categorías. Concederanse trofeos aos tres primeiros clasificados por cada categoría e sexo establecidos en cada carreira.