Onte produciuse, por fin, o arranque do Circuíto Correndo pola Costa da Morte, en Camariñas, tras ter que ser aprazado o pasado domingo día 11 pola ameaza do temporal Félix. Pero a decisión non puido ter sido máis acertada, pois na vila do encaixe luciu un día perfecto con sol, boa temperatura e, apenas, unha brisa, que acompañou á práctica do deporte. Así, non só os 889 atletas encheron o paseo marítimo, o punto de saída da competición, ao longo da mañá, senón que todo o pobo camariñán se envorcou na proba, incluso máis que outros anos, aínda que pareza imposible, levando polo aire aos deportistas, sobre todo, nos últimos metros para chegar á meta. E é que xa se botaba en falta o pistoletazo de saída do circuíto máis exitoso de atletismo da comarca que, este ano, fíxose de rogar. Así, o ambiente en Camariñas non foi outro que coma se da mesmísima festa da Virxe do Carme tratásese, coas terrazas cheas, outro aspecto positivo deste evento deportivo: que repercute no turismo. ¿E por que non celebralo? Si nin sequera produciuse incidente algún. Todo saíu perfecto, do mesmo xeito que estivo a organización.
E como non podía ser doutro xeito, non se quixeron perder a cita os máis habituais. Aqueles que, só polo seu afán de superación, xa teñen o ceo gañado. A pequena Sara Vieites, a mesma á que os médicos lle dixeron que nunca volvería camiñar e aí está, e Luis Miguel Bardanca, que no seu handbike logra todo o que se propón. Este último, carballés de 31 anos, recoñeceu onte que este ano estaba un pouco desanimado a participar por diversos problemas médicos que sufriu nos últimos meses. No entanto, a forza do público coa que se atopou onte serviulle de moito: «Así dan ganas de seguir loitando», expresou. Levaba moito tempo sen apenas adestrar e, a pesar diso, levouno «bastante ben».
Inmellorable público
Pero tamén houbo xente para a que esta pedestre foi a súa primeira participación no Circuíto Correndo pola Costa da Morte, como Lorena Giraut (Ames, 1990) que, aínda así, foi a gañadora absoluta da proba de 3 quilómetros, algo co que «para nada contaba», contou. Do mesmo xeito que a gran cantidade de espectadores: «Asombroume moitísimo que houbera tanta expectación». Adoitada facer deporte, quería probar unha distancia curta e animouse, e pareceulle «alcanzable».
«Pareceume dura os primeiros catro kilómetros e, sinxela, os cinco de volta»
Outro que tamén se estreou no circuíto e ao grande ao gañar a proba máis esixente, a de dez quilómetros, foi Antonio Teijido (Guitiriz, 1986). O lucense de 32 anos describiu así a experiencia: «A carreira pareceume moi bonita. Dura os primeiros catro kilómetros, aínda que as vistas que viñeron despois serviron de recompensa, e sinxela os cinco kilómetros de volta. Gustoume moito, polo que tratarei de asistir a todas as que poida».
Este atleta profesional era coñecedor das boas marcas de Antelo e Muíño.
«Este logro serve para visibilizar ás mulleres deportistas no rural»A deportista habitual que non fallou no podio absoluto feminino nesta carreira inicial foi a vimiancesa Teresa Castro (Noia, 1968) para a que, a piques de cumprir os cincuenta anos, este novo logro, entre os tantos que acumula na súa longa traxectoria deportiva, serve, como ben explica ela, para «visibilizar ás mulleres deportistas no rural» e, así mesmo para «mostrar que, a partir de certa idade, podemos seguir competindo a un alto nivel».
A vimiancesa destacou o «espectacular traballo que realiza a organización»