O dominio de Rubén Diz nas carreiras provinciais estendeuse unha semana máis. O atleta limiano da Ximnástica de Pontevedra volveu demostrar o seu potencial e impúxose na Nocturna de Celanova, que viviu a súa edición número 14. Na categoría feminina, a vitoria levoulla a santiaguesa Raquel Suárez Pedrosa.
A velocidade volveu marcar os 7,8 quilómetros de percorrido que tiña o prato forte da xornada, que arrincou ás 22:30. Diz non tardou en levar o peso. Desde a saída e, en cada un dos pasos intermedios, marcou un ritmo imposible de seguir para os seus rivais. E cun tempo de 24:35 minutos, cruzou a liña de meta en solitario e gozando do recoñecemento do público. Por detrás, o seu compañeiro Akka Essaadaoui, que entrou a 38 segundos do gañador. Pechou os postos de honra, Javier Paredes, con 26:07.
Na categoría feminina houbo máis igualdade durante boa parte da carreira. Aínda así, a santiaguesa Raquel Suárez fíxose co mando desde os primeiros controis intermedios e xa non o soltou. O tempo de 28:56 permitiulle levar o triunfo. Ariana González, a 21 segundos, e Ana María Ocampo, a 1:47, escoltárona no podio.
A partir de aí, goteo constante de corredores, que volveron cumprir con fartura a efectos de participación.
Antes, desde as 22:00 horas, foron os máis novos, con distancias adaptadas, os que puxeron o seu gran de area para que Celanova gozase dunha festa do atletismo.