O marroquí Hassan Lekhili, fincado en Ourense, sucede a Lolo Penas no palmarés de gañadores da SantYago 10K. O atleta do Ourenrunning, un dos grandes especialistas do fondo, dominou a carreira con gran autoridade e cruzou a liña de meta na Praza do Obradoiro cun tempo de 32.28. Impuxo un alto ritmo imposible de seguir polos seus adversarios. Avantaxou en 33 segundos a Alejandro Fernández. Completou o podio masculino Amador Penas.
No cadro feminino o triunfo foi para Sandra Mosquera, do Comesaña Sporting Club, por diante de Tina Fernández, do Urban Runner Club Santiago.
A diferenza de hai un ano, a carreira arrincou xa sendo noite pechada, con doce graos de temperatura e choiva. O tempo, máis desapracible, non foi óbice para que os corredores puidesen gozar dun trazado único.
Na primeira edición o club organizador, o Atletismo Fontes do Sar, optou por un circuíto de cinco quilómetros ao que os participantes tiñan que dar dúas voltas. Nesta foron dez quilómetros en liña, con algo máis de pendente.
A SantYago 10K volveu cumprir coas expectativas da entidade impulsora desta proba e, especialmente, a de chegar a un amplo abano de afeccionados, moitos deles procedentes de fóra de Galicia.