O municipio de Porto do Son acolleu onte a proba absoluta da exitosa carreira popular Sin Son 10 K, que este ano alcanzaba a súa sexta edición e na que participaron un total de 1.711 corredores. Nunha mañá fría, pero asollada, a marcha iniciouse ás 11.00 horas na zona portuaria de Portosín. Abrírona, cinco minutos antes, doce corredores sobre patíns. O encargado de dar o pistoletazo de saída foi o olímpico Iago López.
Entre os participantes atopábanse o vicepresidente da Xunta, Alfonso Rueda, e os alcaldes de Ou Son, Luís Oujo, e de Ribeira, Manuel Ruiz.
Tras un primeiro tramo ata o Cub Náutico, os corredores enfilaron a estrada N-550, que permaneceu cortada ao tráfico desde as dez e media da mañá ata pasado o mediodía. Tampouco quixeron perderse esta cita os atletas Iván Raña, Víctor Riobó, Esther Navarrete e Paula Mayobre.
Na táboa de clasificación absoluta, os gañadores na categoría masculina foron Nuno Costa (cun tempo oficial de 29:48); David Santos Domínguez (30:03); e Pablo Bocelo Belas (31:29). Na categoría feminina, as gañadoras foron Esther Navarrete Santana (que cun tempo oficial de 34:35 entrou no posto número 24); Esther Rodríguez Díez (no posto 68, cun tempo de 36:03); e Clarisse María Pinho Cruz (no posto 78, cun tempo de 36:28). Respecto da clasificación na modalidade de patíns, os vencedores da proba na categoría masculina foron Gonzalo López Paz (do club Galicia Rollers, cun tempo oficial de 24:07); Santiago Fernández Rial (do Club de Atletismo Fontes do Sar, cun tempo de 24:09); e Enrique Muíños Reyes (31:22). Na categoría feminina, os primeiros postos foron para Itziar Vales Noia (do club Galicia Rollers, cun tempo de 30:10); Sabrina Muíños Reyes (31:22); e Raquel Saavedra Cabo (do club Galicia Rollers, con 33:00).
En canto aos políticos, Alfonso Rueda cruzou a liña de meta un minuto antes que os alcaldes. Ruiz chegou antes que Oujo, pero esperoulle para atravesar xuntos a cinta nun xesto de compañeirismo e deportividade que foi, en xeral, a tónica dominante nunha proba interxeracional que parece consolidarse na súa sexta edición e na que deportistas de todas as idades percorreron os dez quilómetros que unen Portosín e Porto do Son... mirando ao mar.