O deportista lucense Manuel Hurtado impúxose na súa casa ao conquistar a segunda edición do Cros Ponte Romana de Lugo, proba que forma parte do calendario da Real Federación Española de Atletismo e que se adxudicou en categoría feminina absoluta Clarisse Pinho.
O estado do campo, blandísimo, endureceu a proba e tras un percorrido de 9.650 metros na contorna do Pazo de Feiras e Congresos de Lugo, Manuel Hurtado parou o cronómetro en 32:27 minutos, cunha ampla vantaxe sobre o segundo clasificado, Esteban Igrexa (34:16), que superou en sete segundos a Miguel Penedo (34:23), terceiro na meta.
Na categoría feminina, Clarisse María Pinho rozou os catro minutos por quilómetro e completou os 8.100 metros de distancia en 32:45 minutos.
O seu triunfo frustrou o dobrete dos irmáns Hurtado Sanjurjo xa que María foi a segunda clasificada cun tempo de 33:57 minutos, xusto por diante de Ariana González (34:12).
Ademais da proba absoluta, celebráronse carreiras desde prebenjamín e unha popular mixta para os nados ata o ano 2000.
A fondista lucense María Abel, olímpica en Sidney 2000 e Atenas 2004 e posuidora de catro coroas nacionais, foi homenaxeada na segunda edición do Cros Ponte Romana.
Nun acto emotivo, Abel recibiu un ramo de flores que lle entregou a súa filla e un trofeo de man da secretaria xeral para o Deporte da Xunta de Galicia, Marta Míguez, tamén olímpica.