Cun percorrido de dezaoito quilómetros, de dificultade media, disputarase o trail solidario Proxecto Home Galicia, que comezará ás dez da mañá na Granxa do Xesto.
Esta carreira é unha das diversas actividades que organiza o Proxecto Home no marco dos actos conmemorativos do seu 25 aniversario. Neste trail están inscritos máis de 80 deportistas, entre os que cabe destacar a presenza de Pedro Nimo, campión de España de maratón; Fátima Paz, subcampioa galega de trail; e Manuel Castiñeiras, secretario técnico do Compostela. Hai outros moitos que xa deron o seu apoio á proba, a pesar de non poder asistir, como Óscar Pereiro, Fran e Álvaro Pino.
Uns minutos despois do inicio do trail terá lugar a saída dunha andaina solidaria, na que se inscribiron máis de 200 persoas, que percorrerán un trazado de cinco quilómetros de dificultade baixa. Tamén partirán desde a Granxa do Xesto.
Os premios serán dun trofeo para os tres primeiros en cada unha das categorías (masculina e feminina, absoluta e veterana) doados por varias empresas galegas. Haberá trofeos para a entidade, o club e a empresa con máis participantes.