O Cros de San Miguel de Oia, unha das citas grandes do calendario do campo a través en Galicia, foi unha reedición do campionato galego disputado quince días atrás en Ribadavia. Polo desenvolvemento da carreira masculina e polo podio final, que volveu estar encabezado por Lolo Penas. Na proba feminina Sandra Mosquera foi a máis forte e levou o triunfo.
Lolo Penas viviu un fin de semana triunfal. O sábado estreouse no dúatlon -modalidade á que chegou o ano pasado por mor dunha lesión que lle levou a adestrar en bicicleta- e fíxoo con triunfo en Guitiriz, e na mañá do domingo aceptou o reto de participar na 40 edición do Cros de San Miguel de Oia. Como sucedese en Ribadavia, desde o principio formouse un grupo comandado por Manuel Furtado, que puxo un ritmo forte na carreira que só puideron seguir Nuno Costa e Lolo.
Os dous enseguida deixaron atrás ao lucense e fóronse en solitario repetindo a rivalidade do galego. A diferenza de entón, o luso pegou dous machadazos intentando romper a carreira para abortar o mellor final do coruñés, pero Lolo aguantou (mellor do esperado polo seu esforzo do sábado) e chegado o momento decisivo da carreira pegou o seu cambio de ritmo característico para levar o triunfo, deixando a Nuno na segunda posición e a Furtado na terceira. O mesmo podio do campionato galego da disciplina.
No apartado feminino tamén repetiron algunhas das protagonistas. Sandra Mosquera, que fora segunda, levou o triunfo por diante da súa compañeira do ADAS Valdeorras Leticia Fernández, completando o podio monocolor Iria Fernández. O conxunto barquense leva un inverno triunfal. Sandra controlou a carreira en todo momento e avantaxou á súa inmediata perseguidora nun minuto.
A cita de Oia co campo a través contou con carreiras para os máis pequenos e incluso un apartado para o programa Xogade da secretaria xeral para ou deporte. Sen dúbida, un dos bastións do cros, bendicido no día de onte por un circuíto de auga e barro. Como os de antes.
Fonte: www.lavozdegalicia.es