Reyes Estévez será a gran atracción da carreira popular de Padrón, que se celebrará o sábado a partir das once menos cuarto da mañá. Entre os logros máis importantes do veterano atleta, destaca a medalla de ouro nos 1.500 metros conseguida en Budapest (1998), no Campionato de Europa, e a prata na mesma distancia lograda en Múnic (2002) no Campionato de Europa. Ademais, conta con dúas medallas de bronce nos campionatos mundiais de atletismo en Atenas (1997) e Sevilla (1999), así como a prata alcanzada en Lisboa (2001), no Mundial de pista cuberta. Outras medallas de Reyes Estévez foron os bronces de Madrid (2005), no Europeo de pista cuberta nos 1.500 e nos 3.000.
Reyes Estévez animou a participar nesta carreira cun vídeo nas redes sociais. O prazo para inscribirse na proba concluirá mañá, 23 de marzo, ás doce da noite para os atletas adultos. Ás dez da noite será a hora tope para as carreiras escolares (xuvenís incluídos).
Inscricións
Haberá trofeos para os tres primeiros clasificados de cada categoría e premios especiais para o primeiro corredor local, para o participante máis novo, para o máis veterano e para o colexio ou club con máis participantes. Ademais, recibirán un premio en metálico de 200, 150 e 100 euros os tres primeiros clubs clasificados, tanto en categoría masculina como feminina. A inscrición será gratuíta para as categorías comprendidas entre pitufos e xuvenís. Os adultos (de júnior a veterano) deberán pagar seis euros.