As atletas Rocío Alvite, de Mazaricos, e Barca Toba, de Muxía, protagonizarán un dos duelos máis interesantes na sétima edición da Carreira Popular Concello de Vimianzo, segunda cita do circuíto Correndo pola Costa da Morte.
Rocío Alvite é a actual campioa do circuíto do 2016 e Barca Toba, que compite co Club ADAS do Barco, é das máis destacadas no panorama da Costa da Morte. Ningunha puido estar presente na cita de Camariñas, polo que será a primeira vez que se enfronten nunha cita comarcal.
A última vez que competiu Barca Toba foi na Carreira dás Areas de Carnota, no ano 2014, na que se impuxo na categoría feminina a Guadalupe Moreno (Toledo) e a Silvia Deira (Boiro), cun tempo de 43 minutos e 35 segundos. Rocío Alvite foi segunda no 2015 tras Vanesa Lafuente (Carballo), cun tempo 41:29, e primeira, a pasada edición, cun rexistro de 40:57, que é o mellor tempo ata o momento.
Mañá concluirá o prazo de inscrición na web. Onte estaba confirmada a presenza de 620 participantes, dos que 454 pertencen aos anotados ao circuíto.
Categoría adaptada
Vimianzo, do mesmo xeito que ocorreu con Camariñas, forma parte das cinco citas da categoría adaptada. As outras son Mazaricos, Zas e Cee. Os participantes son Luis Miguel Bardanca (Carballo) e Martín Varela (Corme) e as novidades corresponden a Alejandro Ferradás e Anxo Placido López. Neste apartado, que ten as modalidades, en cadeira de rodas ou handbike, os participantes deberán realizar a de 10K. Precisamente, nesta proba reina, os organizadores esperan ver en acción a Javier Tourís (A Coruña), Míchel Antelo (Vimianzo) e Iván Redondo (Lugo), que coparon os tres primeiros postos na carreira de Camariñas, así como a Adrián Rojo (Camariñas), cuarto, e Gonzalo Silva (Santa Comba), quinto, entre a longa lista.
Fonte: www.lavozdegalicia.es