Un ano máis o Trofeo Club Deportivo Aurum acolleu no seu programa os Campionatos Autonómico e Provincial dos 10.000 metros, unha proba na que os atletas ourensáns volveron marcar o ritmo, aínda que esta vez Alejandro Fernández e outros especialistas da distancia tiñan outros compromisos máis ambiciosos nas súas axendas.
O antelano Rubén Diz impúxose con total autoridade, deixando atrás a todos os seus perseguidores para loitar ao final en solitario contra o tremendo chuvieiro que descargou en coincidencia cos quilómetros finais da carreira masculina. O atleta enrolado na Ximnástica de Pontevedra volveu así ao alto do podio, no cal o acompañaron Roberto Jiménez (A Branca) e Víctor González (Comesaña).
Tamén foi contundente o dominio de Iria Fernández na categoría masculina, aínda que Soledad Castro (Comesaña) prolongou ao máximo a persecución e Mar Luz Ferreiro (Ourenrunning) redondeou as tres primeiras prazas, máis lonxe da atleta do ADAS do Barco.
Do resto dos vencedores da xornada, cabe destacar que a final B masculina, adxudicoulla Julián Romero (Ourense), por diante de Albino Fernández (Arenteiro) e do seu compañeiro de equipo Daniel Valentín, que terminou na terceira praza, mentres que o palmarés da convocatoria do Club Aurum repartiuse sobre todo nas categorías de base do propio Ourense Atletismo.
Entre os benxamíns, Unai Bertalo e Amaya Iglesias , ambos os do conxunto da capital, gañaron nos 500 metros, en tanto que Iria Taboadela (ADAS) e Sergio Prieto (A Estrada) foron os vencedores na carreira alevín.
Anxo Losada (infantil) e Fiz Losada (cadete) foron os máis rápidos nos 1.000 metros, coa camisola do Fontes do Támega, para completar o éxito do Ourense cos triunfos do María Nóvoa (cadete) e Antía Castro (infantil) na versión feminina da mesma distancia.
En suma, unha notable participación de novos valores locais, xunto a un ramallete de fondistas que protagonizaron outra entretida xornada nas pistas do estadio universitario, a pesar da torrencial choiva.