Onte presentouse o calendario do Circuíto Coruña Corre , que para esta tempada ve ampliado o número de probas deportivas populares que se disputarán na cidade. Estas darán comezo xa este mes de novembro, un arranque adiantado respecto do que vén sendo habitual neste tipo de circuítos, pero segundo destacou o concelleiro de Deportes, José Manuel Sande, a data proposta pola Federación de Atletismo do mes de xaneiro afastábase moito da celebración das probas anteriores na cidade.
Así, tras a celebración o próximo 21 de novembro no Ágora da Gala Final da tempada 2017-2018 de Coruña Corre , arrincará xa o novo curso coa oitava edición da carreira de NovoMesoiro , o 25 de novembro. A esta seguiralle a do barrio dos Rosales o 16 de decembro, que será a última que se celebre dentro deste 2018.
Xa o ano que vén, o 13 de xaneiro, terá lugar a cuarta edición da carreira de Matogrande, e no mes de marzo, o día 23, a novena Carreira Popular Torre de Hércules Trofeo José Antonio Varela Calviño, única proba de todo o calendario que se disputa en horario nocturno.
Antes do verán, o 2 de xuño, celebrarase a baixada de cros de San Pedro de Visma. E tras o descanso estival, o 9 de setembro, volve a actividade deportiva coa oitava Volta a Oza, seguida o 20 de outubro pola carreira do Ventorrillo. Polo demais, xa están fixadas tamén as datas das grandes carreiras populares da cidade. O Medio Maratón Coruña 21 será o 17 de febreiro; o Maratón Atlántica Coruña 42, xunto coa 10K, celebraranse o 14 de abril, e o 6 de outubro será a quenda da Coruña 10.
O prazo de inscrición para participar nas probas do Circuíto Coruña Corre abrirase nos próximos días.