O temporal de vento e choiva condicionou a carreira popular de Xinzo de Limia afectando á menor participación de corredores infantís. Con todo, os atletas absolutos e veteranos desafiaron o frío e a choiva para percorrer os dez quilómetros da proba sénior. O local Rubén Diz foi o dominador da carreira, cunha vantaxe de máis dun minuto sobre o seu perseguidor. O antelano investiu un tempo de 32,04 en realizar o percorrido. O segundo posto foi para o tamén veterano Luis Iglesias Raña, con 33,21 min. No terceiro lugar, entrou na meta Saturnino González Nóvoa.
Na carreira feminina impúxose, por terceiro ano consecutivo, Sonia Teijeiro, con 39,53 min. Foron 231 os atletas absolutos que lograron completar a carreira.
Na proba por substitucións, venceu o equipo formado por Miriam Opazo, Ziad Nagihi e Alba Rivero. Nas carreiras de categorías inferiores houbo menor participación da esperada, dado o frío día que se presentou pola mañá. Foron 21 os nenos que completaron o percorrido das categorías infantil e cadete, que gañou Álex Domínguez Fornos, nun final moi competido co tamén cadete Anass Nagihi. O mellor infantil foi Gabriel González Pereira.
A proba para alevíns e benxamíns, con 26 nenos en meta, saldouse co triunfo de Javier Malingre na primeira categoría e de Miguel Carbajales como mellor benxamín.