En apenas 30 minutos e 17 segundos, Youness Ait Hadi proclamouse gañador absoluto en categoría masculina da Carreira 10, seguido moi preto por Abdelmounin Harroufi, xa que foron os segundos que o separaron de levar o primeiro posto. O terceiro posto logrouno Alejandro Fernández cun segundo de diferenza con respecto a Abdelmounin.
A vitoria na categoría feminina foi para a cántabra Paula González Berodia, cun tempo de 35 minutos e 20 segundos, que no 2012 foi campioa de España de pista cuberta na modalidade de 3000 metros.O segundo posto levoullo a gañadora da pasada edición Solange Pereira, que a pesar de mellorar a súa marca do ano pasado, non logrou superar a González Berodia e fixo un tempo de 35 minutos e 38 segundos.
Paula Mayobre González fíxose co terceiro posto da carreira, que non estivo este ano exenta de polémica pola decisión municipal de dobrar o prezo para poder participar de 5 a 10 euros. Así, fronte aos preto de seis mil participantes que percorreron as rúas da Coruña na pasada edición, este ano tan só houbo 3.619 inscritos.